Diksyonè Kreyòl.

162 mo ki kòmanse ak «P»

Pibliye

Fè yon bagay vini disponib pou piblik. Eta yon bagay anpil moun vini konnen. Ekri yon liv epi peye yon konpayi pou fè anpil kopi liv la pou mete li vann nan librèri. Eta yon jounal ki disponib pou moun achte.

Pikan

Yon ti pwent file ki nan branch anpil pye bwa. Se yonn nan bagay peyizan ayisyen pi pè lè yo ap mache nan raje san soulye nan pye yo paske pikan kapab rantre nan pye yo.

Pike

Pouse pwent yon bagay, yon pikan nan yon pati nan kò yon moun jis pwent la rantre nan kò moun nan. Sansasyon yon moun santi nan bouch li ki tankou yon bagay ki ap rantre nan vyann bouch li lè li gen yon bagay tankou piman andedan bouch li.

Pil

Anpil bagay, moun, ki rasanble ansanm. Batri.

Pilon

Yon twons bwa atizan ayisyen fouye yon bèl tou nan li epi moun itilize li pou kraze kèk grenn tankou mayi, pistach, kafe, pitimi e latriye.

Pilonnen

Frape pye sou yon bagay avèk espwa li ap ale kraze. Aksyon moun ki mete plat pye yo sou do pye yon moun pandan anpil moun, yon foul moun kanpe nan yon espas ki twò piti pou kantite moun yo.

Pilòt

Pilòt: Moun ki kondi, pilote avyon. Moun ki fè avyon, elikoptè vole.

Pilote

Kodi, fè yon avyon, elikoptè vole.

Pilye

Anpil bagay ki reyini, rasanble ansanm. Plizyè pil ansanm.

Piman

Grenn yon ti pye bwa kout ki kapab pike anpil. Gen plizyè piman tankou piman-zwazon, piman-dous avèk piman-bouk. Piman Bouk, Yon piman ki pi gwo pase piman-zwazo, men li pi piti pase piman-dous e li pike tou; yon ti kras mwens pase piman-zwazo. Piman Dous, Yon piman ki pa pike, men moun ki ap fè manje renmen itilize li pou bay manje bon gou. Moun manje piman-dous nan salad tou. Piman Zwazo, Yon ti piman wouj e piti ki pike anpil.

Pini

Fè yon moun soufri pou yon move bagay li fè tankou vyole lalwa, fè yon krim e latriye. Mete yon moun nan prizon.

Pipi

Yon likid jón ou byen gri ki soti nan koko, zozo yon moun, yon bèt paske kò li pa bezwen likid sa pou ede kò a devlope, rete an sante.

Pipirit

Yon bèl ti zwazo, mal la avèk femèl la kapab bo pandan yo ap vole. Yonn toujou ale tout kote li gen pou li ale avèk parèy li.

Pistach

Yon plan ki bay yon rasin ki divize an de pati: yon pati fen e yon pati pwès. Pati pwès la gen grenn andedan li e moun manje grenn sa yo. Moun fè manba, bè avèk grenn nan.

Pitimi

Yon plant peyizan ayisyen kiltive sou plantasyon yo. Li bay yon grap ki gen anpil ti grenn nan li. Gen de varyete pitimi: yonn pye li pi kout e li gen pi bon gou pase lòt la ki pi wo. Sa pye li pi wo a, moun ki ap kwit li gen pou yo mete anpil bagay nan li pou jwenn gou li.

Pitit

Yon moun manman li avèk papa li te mete ansanm pou fè li nan moman manman an te ap ovile. Pitit Fèy, Nenpòt moun lwa ki monte yon bòkò te trete maladi li, te touye yon moun pou li e moun oblije patisipe nan seremoni vodou bòkò a chak ane pou peye yon pati nan dèt li.

Pitza

Yon manje ki fèt avèk farin e li kòmanse fèt tankou jan moun fè pat pen, men pat sa a pa gen leven nan li. Lè moun nan fini plati pat la li mete sòs tomat sou li avèk kèk lòt bagay anvan li mete li nan fou.

Piyajè

Piyajè: Moun ki patisipe nan yon piyay. Moun ki pran plezi nan resevwa bagay nan men lòt moun.

Piyay

Yon moman kote anpil moun resevwa libète pou yo pran tout kantite yo kapab pote nan yon kantite bagay. Libète anpil moun pran pou yo kòmanse pran bagay lòt moun posede san moun nan pa bay otorizasyon pou pran bagay sa yo.

Piye

Moman anpil moun pran anpil bagay yon moun te posede san moun nan pa bay otorizasyon pou pran bagay sa yo.

Piyon

Yon vil nan Depatman Nò peyi Ayiti ki toupre Mayisad; anviwon 18 kilomèt konsa.

Plak

Yon moso materyèl ki sanble avèk jansiv moun, ki gen dan nan li e ki kapab chita sou jansiv yon moun pou ranplase jansiv avèk dan moun. Yon moso plastik tou won avèk ti tras sou ki gen mizik anrejistre sou li. Nan ane 1980 yo konpakdis vini epi li ranplase plak.

Plan

Preparasyon ki fèt pou konnen, anvan yon bagay rive, kijan li ap ale pase. Desen sou papye pou montre kijan yon kay e anpil lòt bagay ap ale fèt.

Plane

Aksyon yon bèt ki soti anlè pou desann anba, men li kite de zèl li ouvri pou ralanti vitès jan kò a ap tonbe sou tè a. Plizyè moun te eseye plane nan fè eksperyans pou vole tankou zwazo e se eksperyans sa yo ki fè moun konprann kijan pou yo fè pou desann avyon atè. Se zwazo avèk avyon ki vrèman kapab plane. Aksyon yon moun ki bay yon bagay li posede nan yon biznis pou mèt biznis la kapab prete li lajan. Moun sa ap resevwa bagay la lè li pote lajan avèk enterè retounen.

Planèt

Planèt: Plizyè kò nan lespas ki pa kole avèk tè a, ki pa gen limyè sou yo e ki ap vire fè wonn solèy la.

Planifye

Prepare yon bagay pou li rive menm jan yon moun vle li rive. Fè yon plan.

Plant

Yon pye bwa ki piti, kout e ki kapab rete kout pou jis li seche, mouri. Gen anpil ti pye bwa kout tankou pye pwa, pye piman, mayi, pitimi e latriye peyizan kiltive nan jaden. Apre sezon jaden yo pase, plant la mouri epi kiltivatè yo sekle tè a pou plante menm grenn plant sa ankò.

Plantasyon

Yon tè kote moun fè jaden. Kote ki gen plant nan tè kiltivatè ap tann yo donnen.

Plante

Mete grenn yon plant nan tè pou li gèmen epi grandi. Mete yon ti plant nan tè pou li kontinye grandi.

Plas

Nenpòt kwen ki egziste sou tè a. Yon kote nan yon vil ki gen bèl flè, ban pou nenpòt moun chita nan kèk lè rezonab tankou soti nan sisè nan maten pou rive nan disè lannwit.

Plat

Asyèt. Eta yon bagay ki pa gen gwosè. Eta yon bagay ki gen fòm fas dlo ki pa ap souke. Plat Pye, Pati nan pye yon moun ki touche tè a lè li ap mache san soulye nan pye li.

Plati

Fòse yon bagay vini plat.

Plato Santral

Yonn nan nèf divizyon nan peyi Ayiti yo e ki nan mitan peyi a avèk yon kwen li kole avèk Dominikani, yonn avèk Depatman Lwès la, yon lòt kwen avèk Depatman Latibonit e dènye kwen an kole avèk Depatman Nò a. Kapital depatman sa a se Ench.

Plen

Mete bagay andedan yon lòt bagay pou jis anyen pa kapab antre andedan li ankò.

Plenn

Moman lè yon bèt ap pote pitit andedan vant li. Gwosès. Kantite tan sa varye pou chak fanmiy bèt. Yon kote ki gen anpil pye bwa, anba yo imid e li fè nwa tout tan.

Plenyen

Travay yon moun ki ap rakonte mizè li, tribilasyon li bay yon moun avèk espwa moun sa a ap ede li rezoud pwoblèm sa yo. Lamante. Fè yon bri ki soti nan gòj san kite yon vrè mo soti. Plenyen egzije anpil enèji.

Plezi

Yon bagay yon moun renmen fè e li gen kè li kontan lè li ap fè bagay sa a. Jwisans.

Pli

Tras, mak kote yon bagay te vlope, pliye. Tout rad ki fini lave gen pli sou li anvan moun pase li.

Plim

Kèk ti branch fil ki parèt soti nan kò moun avèk bèt. Kèk lè tou yo grandi long sou kò moun ou byen bèt. Sa ki pi long nan kò moun yo parèt nan tèt yo, anba zesèl yo, nan pati entim yo. Kèk bèt tankou mouton gen anpil plim sou kò yo.

Plis

Diferans, pi wo, ant kantite yon bagay te dwe ye e kantite li ye a. Kantite ki ogmante sou yon bagay. Ogmante de kantite, de nonb yonn sou lòt.

Plizyè

Plizyè: Anpil bagay ansanm e ki kapab menm bagay la ou byen diferan ant yo.

Ploge

Rantre yon bagay nan pwent yon lòt pou kontinye distribye yon bagay tankou dlo, eltektrisite bay yon lòt zòn, yon lòt aparèy. Danse avèk yon lòt moun yon fason pou tou de kò yo kole e deplase ansanm san dekole pou jis mizik la fini.

Plonje

Pouse, fòse yon bagay rantre anba dlo. Aksyon yon moun ki lage kò li nan dlo tankou yon rivyè, lanmè, pisin. Yon moman kote yon avyon, yon zwazo, yon elikoptè kite wotè li te ap vole a pou desann pi ba e vit.

Pò

Pò: Yon kwen nan lanmè kote bato rete pou yon debake e anbake machandiz. Anpil ti tou, kanal ki sou tout kò moun pou ede respirasyon kò a fèt.

Pòch

Pòch: Yon tou yon koutiryè, yon tayè fè nan yon rad pou moun ki mete rad la kapab mete sa yo bezwen itilize vit tankou yon kle kay, yon bous, lajan.

Pòdepè

Yon vil e kapital Depatman Nò Lwès peyi Ayiti. Port-de-Paix.

Poetik

Travay yon ekriven ki ekri tèks tankou poezi.

Poezi

Yon fason kèk ekriven ekri plizyè ti moso tèks pou esplike yon ti moman, yon ti istwa, yon bagay imajinè. Yon poezi sonnen tankou yon chante lè moun ap koute li.

Pokè

Pokè: Yon jwèt kat kote jwè yo mize lajan yon premye fwa pou kòmanse jwèt la. Apre sa a, chak jwè ki panse yo gen kat pou genyen pati a mete plis kòb. Jwè ki pa kapab mete plis kòb e ki konnen yo pa genyen gwo pwen nan men yo oblije kite jwèt la. Konsa jwè ki gen anpil kòb avèk gwo pwen kapab kontinye mete plis kòb. Kèk fwa tou moun ki gen plis kòb la konnen blofe lòt jwè a epi dekouraje li avèk lajan. Jwè ki genyen an pa menm oblije montre kat ki te nan men li.

Poko

Eta yon bagay ki bezwen plis tan pou li rive. Yon mo ki ale devan lòt mo pou esplike yon bagay, yon chanjman ki ap ale fèt, rive, regle e latriye.